ZIYABULALANA KWIMIDLALO YE-BASKETBALL

UMBIKO: MABUNHLE MLABA

ZIYABULALANA kwiNational Basketball Under-16 Championships edlalelwa e- University of KwaZulu-Natal’s Old Mutual Sport Center eThekwini. Le midlalo ihlelwe iKwaZulu-Natal Basketball Association kanti kudlala kuqhudelana izifundazwe ezahlukene ezibanga ubungqwele bukazwelonke. Akugcini lapho njengoba abazoshaya into ecokeme bazozibeka ethubeni lokuqokelwa iqembu lesizwe. Usuku lokuqala luyihambele kahle iKwaZulu-Natal njengoba iqembu labesilisa liyinqobe yonke imidlalo yalo emithathu, kwathi elabesifazane lanqoba emibili. Lo mqhudelwano uzodlalwa izinsuku ezintathu kanti abangeke bakwazi ukuyozibukela bukhona, bangakwazi ukuyibuka kuSuperSport Schools channel. Le midlalo ihanjelwe izikhulu zeKZN Sports Confederation eholwa umongameli wayo uThami Mchunu Kanye ne-KZN KwaZulu-Natal Department of Sport, Arts and Culture eholwa u-HOD Dkt Thobile Sifunda.