SEWUDUMELA EMANSUMPENI OWE-HARRY GWALA SUMMER CUP
ZETHU PHOSWA
SELIDUMELA emansumpeni ngoweHarry Gwala Summer Cup 2024, okuwumjaho wamahhashi
osingathwe isifunda iHarry Gwala.
Lo mjaho uzokuba
eMakhuzeni Traditional Hourse Racing Track, Edazini ngoMgqibelo mhlaka 23 November kusukela ngo-9 ekuseni.
Lo mcimbi ohlelwe yilesi Sifunda Harry Gwala ngokubambisana noMnyango wezeMidlalo, EzobuCiko namaSiko KwaZulu-Natal oholwa uNgqongqoshe uMnuz uMntomuhle Khawula.
UNgqongqoshe uthi lo mcimbi kuhloswe ngawo ukuthuthukisa umnotho uphinde uthuthukise izimpilo zabanikazi namagibeli bamahhashi basezindaweni zasemakhaya.
“Siyajabula ngokwanda kwesibalo semicimbi yemijaho yamahhashi emikhulu ebanjelwa ezindaweni zasemakhaya.
Lo mcimbi uzothuthukisa osomabhizini bendawo, unikeze abanikazi bamahhashi isipiyoni ukhuphule nokuzethemba,” kubeka uKhawula.
Kubhekwe ukuthi ubusegiyeni eliphezulu umjaho iHarry Gwala Summer Day 2024, njengoba nakulo nyaka uzobe uhambisana namaciko azobe enandisa ngomculo nabasiki bengqephu.
Ihhashi elizobe libhekwe ngamehlo abomvu kulo mjaho uNxakanxaka osenqobe lo mjaho kulandelana, nasemjahweni wakamuva uyena(uNxakanxaka) owakhala wemuka nomali ewu-R20 000.
Phakathi kweminye imijaho yamahhashi emkhulukazi ebanjelwa ezindaweni zasemakhaya kubalwa iDundee July ebanjelwe eDundee neKing Cetshwayo July ebaseMpangeni.