ZIWUSHAYE SINYENYELA KU-KHAYA MTHETHWA

UBOPHE ifindo lika sofa silahlane Khaya Mthethwa noNksz Sine Ndlovu ngasese. ISITHOMBE: INSTAGRAM
MABUNHLE MLABA
UMSAKAZI weGagasi FM uKhaya Mthethwa ubophe ifindo lika sofa silahlane noSine Ndlovu sinyenyela, esontweni i-Oasis eMlazi ngempelasonto.
Kuzamazame izinkundla zokuxhumana ngesikhathi lo msakazi obuye abe ngumculi wokholo, enameka izithombe zakhe ku-Instagram evela nesinqandamathe sakhe beshada.
Ushaye ngamafuphi ngokubhala kanje esithombeni sabo “Sithandwa sam (my love).”
Kuzokhumbuleka ukuthi uKhaya wayeshade noNtandoyenkosi Kunene ngonyaka ka-2019 kanti babusiswa ngendodana.
Umshado kaKhaya Mthethwa nale nkosazane eyake yaba uMiss SA lagqabuka ngemuva kweminyaka emibili.
Ngemuva kokuphela komshado uKhaya waveza ukuthi into ebisimchithisa isizungu, be kuba umculo wokholo nohlelo laku-TV lowokholo.
UKhaya, owazakhela igama ngesikhathi edla umhlanganiso kuma-Idols eminyakeni eyedlule, njengamanje uzwakala emoyeni ohlelweni iMidday Connexion alushayela no-DJ Sonic kusukela ngoMsombuluko kuya kuLwesihlanu emini.
