ABE-CHIEFS BAHLELE UMBHIKISO ONOKUTHULA
BATHUTHELENE eNaturena Village abalandeli beKaizer Chiefs, ukuyobeka izikhalazo kubaphathi beqembu.
ISITHOMBE : SABC NEWS
MALIBONGWE MAZIBUKO
ABALANDELI beKazier Chiefs bahlangane ngaphandle kwiKaizer Chiefs Village eNaturena, benza umbhikisho nokuthula, ngenhloso yokufuna izinguquko eqenjini, kulandela imiphumela emibi eqhubekayo kule sizini.
Lo mbhikisho ususwe ukungenzi kahle kwaleli qembu, baboza imidlalo emihlanu ilandelana, kuyo yonke imiqhudelwano, okuphinde kwahlanganiswa nokuhlulwa kanzima ngo 3-0 emdlalweni omkhulu weSoweto Derby ngenyanga edlule.
Abalandeli kubikwa ukuthi bafike bephethe izinqwembe, becela ukuthi kube nezinguquko ekuphathweni nasekusebenzeni kweqembu, njengoba imiphumela yakamuva ibashiye bedumele kakhulu.
Ukukhathazeka kwabalandeli kukhule kakhulu njengoba iChiefs isiphume emiqhudelwaneni ehlukene kule sizini, okubalwa kuyo iCarling Black Label Knockout Cup, iNedbank Cup neCAF Confederations Cup. Ngaphezu kwalokho, iqembu liphinde lalahlekelwa amaphuzu abalulekile kwiBetway Premiership, lokho okunciphise amathuba okubanga isicoco seligi yeBetway Premiership.
Yize kunjalo kuthiwa abalandeli bagcizelele ukuthi umbhikisho wabo ube nokuthula futhi uhlose ukuveza ukukhathazeka kwabo kuphela, hhayi ukudala udlame. Bathi basafisa ukubona iqembu labo libuyela ezingeni eliphezulu ebelikulona eminyakeni edlule.
IChiefs kulindeleke ukuthi izame ukubuyisa ukuzethemba kwayo, uma iqhubeka nemidlalo yeligi lapho izobhekana khona neDurban City mhla ziyi-15 kuNdasa 2026, enkundleni yezemidlalo iFNB eGoli.
Lo mdlalo ubhekwa njengobalulekile eqenjini laseNaturena, njengoba lizama ukukhipha ishwa nokubuyisela ithemba kubalandeli balo.