KWETHULWE INKONTILEKA EZOKWAKHA INKUNDLA KWANONGOMA
UNGQONGQOSHE umhlonishwa Mntomuhle Khawula nomnyango ukhiphe izigidi zamarandi kweyokuthuthukisa eyezemidlalo kwaNongoma.
ISITHOMBE : Nongoma Municipality
MALIBONGWE MAZIBUKO
UMNYANGO weZemidlalo, EzobuCiko namaSiko KwaZulu-Natal wethule ngokusemthethweni iMbovu Dynamics njengenkontileka ezophatha umsebenzi yokuthuthukiswa kweMona Sportsfield kwaNongoma kusukela mhlaka 31 kuMasingana 2026.
Lokhu kumenyezelwe uNgqongqoshe walo mnyango, uMntomuhle Khawula.
Ngokombiko, onjiniyela bakwaSiphulwazi sebeqalile umsebenzi wokulungisa izinhlelo zokwakha, okuyisinyathelo sokuqala salolu hlelo oluzodla izigidi ezingama-R24.4. Le phrojekthi yenziwa ngokubambisana noMasipala womkhandlu wakwaNongoma ongaphansi kobuholi buka Mnuz Emmanuel Zondo futhi izokwenziwa ngezigaba ezimbili.
Isigaba sokuqala, esibiza u-R 6.2 wezigidi zamarandi, sizogxila ekuthuthukisweni kwenkundla ekhona, kwakhiwe indlu yonogada, kufakwe inethi yekhilikithi, kwakhiwe igumbi lokuzivocavoca langaphandle, inkundla yama-aerobics kanye nezakhiwo zangasese.
Isigaba sesibili, esizodla u-R17.1 wezigidi zamarandi sizobandakanya ukufakwa kotshani bokwenziwa, izibani zokukhanyisa inkundla kanye nokwakhiwa kwezinkundla ezihlanganisiwe.
Kuthiwa kulindeleke ukuthi wonke lo msebenzi uqedwe ngomhlaka 30 kaNhlangulana 2027. Umphakathi kulindeleke ukuthi uhlomule kakhulu kulokhu kuthuthukiswa, ikakhulukazi amaqembu endawo afana neNjampela FC okwamanje edlala imidlalo yawo kwezinye izinkundla zangaphandle. Leli qembu okwamanje lisebenzisa uPongola Sugar Mills Stadium esoPongola, kanye nezikole zesifunda. Lokhu kubikwa njengengxenye yemizamo yokuqinisa nokuthuthukisa ezemidlalo endaweni yaseHlalankosi namaphethelo.