ZIBONDIWE KWI-DUNDEE JULY

UMBIKO: MABUNHLE MLABA
umusamedia1@gmail.com

ZIZOBE zibondiwe kwiDundee July yalo nyaka ezokuba ngoMgqibelo kuleli dolobha elidume ngamalahle elisenyakatho ne-KZN.
Ngemuva kokubuka amahhashi egadulisana e- Endumeni Racecourse abathandi bobumnandi bazonikela eBattlefield lapho bezofika bazijuxuze kube manzi phansi njengoba kuboshelwe abaculi abahlabahlosile. Uhlelo luzobe luphethwe unontandakubukwa nozakhele igama eyijaji kuma-SA Idols uSomizi Mhlongo kanti uzobe ethula esiteji abaculi abanjengo Mthandeni, MaWhoo, DJ Tira, Kabza De Small, Kelly Khumalo, Musa Keys noMawelele noNaledi Aphiwe.
Abahleli balo mcimbi wamahhashi oxutshwe nobumnandi bathe bafuna ukukhipha unyawo kwazise bafuna ukugubha iminyaka engu 20 wasungulwa. Kulindeleke kutheleke abantu abasuka eLesotho, eBloemfontein naseGoli bezoba ingxenye yalo mcimbi osubalwa neminye e-KZN ethuthukisa umnotho.
Abe Dundee July banqume ukusika iphethini kwabe Durban July ebiseGreyville Racecourse emasontweni amabili adlule yona ebiphethe i-theme ethi “Marvels of Africa”. Eye Dundee July ithi “African Jewel”.