INTSHA YAKWA-MAPHUMULO NETHUBA LOKUGUBHA EYAMASIKO

ANELE ZUMA

INTSHA yaKwaMaphumulo izotholala ithuba eliyingqayizivele lokugubha inyanga yamagugu ngokucobelelwa ngolwazi lobuciko bezandla, kumcimbi iHeritage Month Youth Cultural Exchange 2025, ezokuba kule ndawo mhla ziyi-19 kuya ku-21 kule nyanga.
USabelo Ndimande, we-Isabelo Sempumelelo Foundation, ebambisene ne-Institute of Africology uthi bahlele lo mcimbi ngenhloso yokuqeqesha intsha ngezindlela zokuzakhela ikusasa.
Uthi kulezi zinsuku ezintathu, abasha bazonambitha ubuciko obuhlukahlukene, okubalwa ukuxoxelwa izinganekwane, umdanso nomculo.
“Sizofundisa ubuciko bokwenza amasongo, izifundo zamasiko, imibukiso yokwelapha ngamasiko, ezolimo zasendulo nokugcinwa kokudla. Kuzoba khona izingxoxo ezijulile ngobusha nesiko esikhathini sanamuhla,, “ kubeka Sabelo.
Uthi lo mgubho walo nyaka ungomusha wama-Afrika, nokuqala kwe-Digital Heritage Archive ezoqopha izindaba nezwi labasha.
Uthi lokhu kuyithuba lokukhulisa ukuzigqaja, ukwakha ubumbano, nokuletha amakhono angathuthukisa izimpilo zabasha emiphakathini yasemakhaya.