AYAPHEKA AYATHULULA AWE-PREMIERSHIP
UMBIKO: MABUNHLE MLABA
NJENGOBA sekuzoqalwa amalungiselelo esizini entsha yeBetway Premiership, amaqembu aseqalile ukuba nezingxoxo nabadlali ahlose ukuzoqinisa ngawo amabhawodi ngoba efuna ukudla izicoco.
IKaizer Chiefs iyona esematheni kwabaningi njengamanje njengoba imataniswa nabadlali abanohlonze. Sekuvele ukuthi uSipho Mbule osanda kuxoshwa iMamelodi Sundowns ngenxa yobuhlongandlebe, ufunwa iChiefs. UMike Makaab oyi-agent yalo mdlali olihlikihla esiswini, ukuqinisekile ukuthi zikhona izingxoxo neChiefs ngokudayiselwa lo mdlali waseFree State ogqame kwiSuperSport United. IChiefs, esonge isizini ngenothi eliphezulu ngokunqoba isicoco seNedbank Cup, kuthiwa bafuna nomdlali wasemuva endaweni yesinxele uMapaseka Mako. Kungenzeka ishiywe ukapteni wayo uYusuf Maart okuthiwa ufunwa ukubuyiswa iSekhukhune United iChiefs ebimthathe kuyo kumasizini amathathu adlule.
I-Orlando Pirates yona kuthiwa inyonyobela unyazi lomdlali waMaZulu FC uTshepang Moremi oqede isizini edlule esefomini enhle nokufakazelwa ukuthi ubizwe kwiBafana Bafana kaHugo Broos ematasa nemidlalo yesihle kulezi zinsuku.