AMATHEMBA AKUMQEQESHI U-LARSEN
UMBIKO: ZETHU PHOSWA
USETHOLE ikhaya elisha uClinton Larsen njengoba eseqokwe njengomqeqeshi weVenda Academy edlala kuMotsepe Foundation Championship.
Besekuphele izinyanga eziyisikhombisa lo mqeqeshi waseThekwini oneminyaka eyi-54 engenamsebenzi ngemuva kokufakwa amasondo iMagesi FC. Waxoshwa ileli qembu laseLimpopo ngemuva kokulisiza ngokunqoba iCarling Black Label ngokuqumba phansi izimfivilithi iMamelodi Sundowns kwifayinali eyayiseBloemfontein. Esexoshiwe uLarsen isikhala sakhe sivalwe u-Owen da Gama ofike wayihlenga ezembeni.
ULarsen usemnkantshubomvu ebholeni. Nguye onyusele iMagesi FC kwiBetway Premiership isuka kuMotsepe Foundation Championship. Useke waqeqesha kwiBloemfontein Celtic, Lamontville Golden Arrows, Maritzburg United neChippa United. Kubhekwe lesi sipiliyoni sisize iVenda Academy yenyukele esigabeni esiphezulu.