BAZOHLAWULA ABADLALI BE-CHIEFS NGOKUBHACAZA
UMBIKO: MABUNHLE MLABA
KUVELA ezithi abadlali be Kaizer Chiefs bazohlawuliswa ngokuboza, bedliwa iMarumo Gallants ngo 2-1 emdlalweni weBetway Premiership enkundleni yabo i-FNB Stadium ngempelasonto.
Ihlulwa nje iChiefs iyona eshaye kuqala igoli kodwa esikhundleni sokunyusa izinga, ivele yalehlisa okwenze iGallants yabuyelwa ukuzethemba yagcina ngokunqoba. Kuthiwa izikhulu zeChiefs sezibambe umhlangano, zitshele ezikabhoqo ukuthi azeneme ngendlela abadlali abazinekele ngakhona enkundleni. Umthombo oseNaturena uthe kuthiwa bazohlawula ngokubhacaza. “Abadlali abazohlawuliswa ilabo abangu 18 abaqokwe ithimba labaqeqeshi ukuya emdlalweni. Izikhulu zithe abadlali bakhombise ukuzithela ngobandayo bangafuna ukulwela amaphuzu agcwele. Okuzokwenzeka ukuthi kunemali ezoncozulwa, abadlali abazonikela ngayo kuma charity organization abazoziqokela wona.
Le nto eyenziwa iChiefs ayiqali ukwenzeka njengoba nakweminye iminyaka edlule yenzeka. Sethemba ukuthi lokhu kuhlawuliswa kuzobavusa emaqandeni kwazise kuneSoweto Derby ne-Orlando Pirates e-FNB Stadium.”
Njengamanje iChiefs isengcupheni yokungaqedi kwi-Top 8 njengoba ihlezi endaweni yesi-9 kwi-log namaphuzu ayi-30 kanti isisalelwe imidlalo emihlanu kusongwe isizini.
