ISIKHULU OBISHINI NGOKUPHATHA BUDLABHA I-CREDIT KHADI YEMKAMPANI

U-JAMES Mioloi osolwa ngokusebenzisa ikhadi lenkampani budedengu.

MABUNHLE MLABA

KUMISWE uMengameli we-Athletics South Africa uJames Moloi ngezinsolo zokusebenzisa i-credit card budlabha.
UMoloi, owangena kulesi sikhundla ngemuva kokuhlula okhethweni u-Aleck Sikhosana waKwaZulu-Natal eminyakeni emibili edlule, ubhekene nengwadla yokumiswa ngemuva kokuqubuka kwemibuzo mayelana nokusebenzisa kwakhe i-credit card ekwavela ukuthi yayiklwejwa ema-tarven nasezindaweni zokudla. Ibhodi le-ASA linikeze uMoloi kuze kube uLwesihlanu ukuthi achaze ukuthi kungani kungafanele athathelwe izinyathelo zokuqondiswa kwezigwegwe.
Lolu daba lusuka embikweni we-SA Sports Confederation and Olympic Committee, oveze ukuthi kuningi okwenziwayo okuthathwa njengokungajwayelekile. UMoloi wazama ukuchaza ukuthi kungani kuvela ukuthi usebenzisa leli khadi le-ASA ema-tavern wathi usuke eyobamba imihlangano yemisebenzi.
Ezinye zezindleko ezihlatshwe umkhosi zihlanganisa ukuvakashela izindawo zokucima ukoma, uMoloi phambilini athe zihambisana nemihlangano yamabhizinisi.
I-ASA iphinde yaqinisekisa ukuthi izophinde ibhekisise ngelibanzi ukuthi azikho yini ezinye izikhulu ezithintekayo kulezi izinsolo, ukuze nazo zibizelwe ekomitini eliqondisa ubugwegwe. Okuzotholakala kulindeleke ukuthi kube nomthelela ekuphathweni kwezimali ngaphakathi komfelandawonye.