KUBOSHWE ABAYI-12 NGECALA LABABULEWE ENANDA
UMBIKO: ZETHU PHOSWA
SEKUBOSHWE abayi-12 ngemuva kophenyo olwenziwe ngamaphoyisa, ngecala labayisihlanu abatholakale bebulewe eNanda namuhla ekuseni.
Ngokuthola kwaleli phephandaba kuthiwa laba basolwa bangamalungu ohlaka olubhekele ukuphepha emphakathi (Forum).
Kuthiwa laba ababulewe bebesolwa ngokuba yizixhwanguxhwangu bethinteka ekushisweni kwemizi emibili namanye amacala.
Okhulumela amaPhoyisa KwaZulu-Natal uCol Robert Netshuinda uthe kuboshwe abayi-12 abasolwa ngokubandakanyeka ekubulaweni kwalaba abahlanu.
Uthe kulaba basolwa kusolakala ukuthi baqhamuka kwi-Forum yakule ndawo, okuyiyo ebhekelela ukuphepha komphakathi.
Uthi amagama abasolwa azodalulwa uma sebevele enkantolo.
Lezi zidumbu zabesilisa ebezilele uyaca eBhambayi zilinganiselwa eminyakeni eyi-19 kuya ku-26, ezintathu bezidindilize enkundleni yazemidlalo yesikole Comprehensive Secondary, ezimbili bezibuqamama nesikole.
Kuthiwa lezi zidumbu
ezingakahlonzwa ukuthi ngezobani, zitholwe zinamanxeba okugwazwa nokushaywa ngocelemba.