I-KZN NEJOKA LOKWANDISA OMPETHA BESIBHAKELA

UMBIKO: MABUNHLE MLABA

KUBANJWE umoya ngokuthi iKwaZulu-Natal yandise isibalo sompetha baseNingizimu Afrika, njengoba uSechaba Zuma ephonse inselelo kwingqwele yeJunior Bantamweight uLwandi Mgabhi.
Bazohlangana e-Estcourt Town Hall ngoMgqibelo ozayo. I-KZN isele ngemuva kunezinye izifundazwe uma kukhulunywa ngompetha bakazwelonke asebekhiqiziwe. Bayisikhombisa ompetha okungoThabiso Mchunu okhonya kwiCruiserweight, Nkosingiphile Sibisi (Flyweight), Ntethelelo Nkosi (Junior Welterweight) Kanti abesifazane kunoNomusa Ngema (Junior Featherweight), Mapule Ngubane (Middleweight) noWendy Gcadu (Super middleweight). Ukunqoba kwangempelasonto kukaLindelani Sibisi isicoco seFeatherweight sekwenze kwaba nethemba lokuthi uZuma uzosandisa isibalo kwazise uzobe elwa ekhaya. Isitha sakhe sidabuka eWestern Cape, kulindeleke ukuthi abalandeli bakaZuma baphume ezinkalo zonke zaseMlazi bezomeseka. UZuma uqeqeshwa uSizwe “Bhubesi” Mthembu eLudonga Boxing Gym eThekwini.
Kulesi sibhakela esiqhathwe uHlengiwe Sithole weHle Jobe Promotions kuzobonakala namabhokisa amaningi aseDundee adume ngokushaya esineNkosi phakathi. Laba ngoMxolisi Zuma, Sakhile Hlatshwayo, Ntuthuko Kunene noMncedisi Duze. Kuqhathwe nempi eyodwa yabesifazane phakathi kukaPrecious Msibi noNomfundo Xaba.