I-GALLANT ISALE INGUMTSHINGO ILAXAZWA UMQEQESHI

UMBIKO: MABUNHLE MLABA

IQEMBU lePremier Soccer LEAGUE iMarumo Gallants lithungatha umqeqeshi omusha kulandela ukushiywa u-Abdeslam Ouaddou ngoMgqibelo.
Lo mqeqeshi waseMorocco ufike kuleli qembu ngenyanga kaMbasa evala isikhala sikaDan “Dance” Malesela owashenxiswa ngenxa yokugqoza kwemiphumela emuhle. U-Ouaddou ufike wahola iqembu waliqedisa endaweni yeshumi. Emidlalweni eyi-12, unqobe emihlanu, wadala ama draw amane wehlulwe kathathu.
Esitatimendeni asithumele kwabezindaba Lo mqeqeshi ubonge uthando alunikwe Abantu baseBloemfontein, wabonga nabadlali ngokudlala ngokuzinikela ngaphansi kwakhe.
Njengoba sekuvuleke lesi sikhala sokuqeqesha sekuputshuke igama likaRoger De Sa njengothishwa ukuyoqeqesha kwiGallants. Lo mqeqeshi omnkantshubomvu isanda kuhamba itoho kwiCape Town City ebidlala kuMotsepe Foundation Championship njengomsizi mqeqeshi. UDe Sa usebuya koqeqesha amaqembu esizwe njenge-Egypt ne-Iran lapho abeyiphi likaCarlos Quireoz.