UFUNA UBULUNGISWA UMNDENI WALOWO OGWAZWE YISOKA E-RICHMOND
UMBIKO: ANDISWA MCHUNU
UMNDENI wakwaNxele eShayamoya eRichmond wowesifazane obe yisisulu esigwazwe yisoka, uthi ufuna ubulungiswa ngemuva kwalesi sigameko esishiye umphakathi ungawuvali umlomo ngesihluku, sokuhlaselwa kulinyazwe uNksz Bongeka Nxele. Loludaba seluze lwangenelelwa uNgqongqoshe wamaPhoyisa kuZwelonke uMnuz Senzo Mchunu kanye noMasipala waseRichmond.
Ngokusho kukaninakhulu wesisulu uNkk Zodwa Nxele uthi naye ube yisisulu, njengoba umgili uZenzele Xaba eqale ngokunenebula yena.
“Umsolwa ngaphambi kokuthi afinyelele kumzukulu, uqale ngokubhaxa mina. Ugasele ekuseni efuna umzukulu wami ngodli. Kuthe uma nginqaba ukumbiza umzukulu wangishaya. Uthe eqhamuka ezolamula wayeka mina wakhipha iskudrayiva wamgwaza wamkhipha iso,” kusho uNkk Nxele.
