OWAYESHADE NOWAKWA-SABC USEPHINDA WASHADA

UMBIKO: MABUNHLE MLABA

LOWO owayeshade nomethuli wezemidlalo kwa-SABC 1 u-Andile Ncube, u-Ayanda Thabethe usethole umendo omusha. Ngokubika kweSunday World edume ngokugobhoza izindaba zosaziwayo, u-Ayanda useshade nesiqumama sikasomabhizinisi uPeter Matsimbe.
Le ndumezulu yomshado yenzelwe eFour Seasons Hotel eWestcliff eJozi ngempelasonto eledlule.
Kulo mshado bekumenywe abemindeni, abangani abasondelene nezithandani kanye nezicukuthwane kanti kuthiwa bekufinywa ngobendololwane.
Kuthiwa u-Ayanda noPeter baqale ukuthandana ngo 2020 kanti ngaphambi komshado omhlophe, umkhwenyane wakwenza konke okwesintu njengoba umthetho usho kanjalo.
UMatsimbe udume ngokuba usomabhizinisi osendimeni yama-truck kanti ubalwa nabambalwa abahlomula ngamathenda kahulumeni. U-Ayanda waduma engumethuli wezinhlelo zakumabonwakude kanti useke wamodelela inqwaba yezinkampani emicimbini emikhulu.
U-Ayanda unezingane ezimbili no-Andile kanti usenezimbili futho noMatsimbe.
Ephuphuma injabulo u-Ayanda unikele ku-instagram ezwakalisa injabulo.” Sibukwa uNkulunkulu sizungezwe abantu abasithandayo, sobabili sisayinde isifungo somhlaba. Lesi isiqalo esisha esisha njengomndeni. Sengimtholile umaqondana wami.”