UNDUNANKULU USUKUMELA ELOKUDLA OKUNOSHEVU KWIZIPAZA
ZETHU PHOSWA
newsroom@selectafricatv.co.za
KUBIZWE umhlangano oyisipesheli wokulwa nezipaza ezidayisa ukudla okungalungele ukudayiselwa umphakathi nezingane.
Lokhu kuvezwe uNdunankulu waKwaZulu Natal, othe kusasa uhulumeni waseKZN, uzoba nomhlangano neziMeya zalesi sifundazwe eMayville, ngenhloso yokutshela oMasipala ukuthi benza umkhankaso wokuhlola izipaza.
Lo mkhankaso kaHulumeni waKwaZulu-Natal oholwa uNtuli uzobhekana ngqo nezipaza ezingekho emthethweni, eziphethwe abokufika abangenazo izimvumo zokuba seNingizimu Africa.
Lokhu kuvezwe uNdunankulu uNtuli esithangamini sabezindaba namuhla eMarine Building eThekwini.
Uthi bakhulume noMengameli wezwe uMnuz Cyril Ramaphosa ngezinkinga ezikhona eKZN, ebeseqhulwini eyezigameko zokugula kwezingane, okusolakala ukuthi kudalwa ukudla okusuke kuthengwe ezitolo ezingekho emthethweni.
Izolo uhulumeni waseKZN uhlale phansi wathatha isinqumo sokuthi isukunyelwe inkinga yezipaza ezidayisa ukudla okubolile nokunobungozi ezimpilweni zabantu.
“Siwuhulumeni wesifundazwe sikhathazekile ngezigameko zokushona nokugula kwezingane ngenxa yokudla okunoshevu okudayiswa ezipaza.
Isigameko sakamuva senzeke eMzumbe lapho kushone khona izingane ezintathu zomndeni owodwa, kwangeniswa ugogo esibhedlela.
Izingane ezishonile ziphakathi kweminyaka engu-2, 6 no11 ubudala,” kubeka uNtuli.
Echaza kabanzi uNdunankulu uthe bewuhulumeni bafuna izitolo zendawo ziphathwe abantu bakuleli zingaphathwa abantu bokufika abakuleli ngokungekho emthethweni.