UMAMKHIZE UBHOBOKE NGOBUHLUNGU NGE-ROYAL AM

UMBIKO: MABUNHLE MLABA

UTHI uzwa iminjunju uMaMkhize ngokwenzeke kuyena, okumvule amehlo ukuthi obani okumele abaqhelise nokumele abasondeze empilweni yakhe.
UShauwn “MaMkhize” Mkhize ukusho lokhu ngesikhathi ebhoboka ku-Instagram, ngemuva kwesikhathi eside engathi vu ngokwehlele iqembu lakhe iRoyal AM.
“Ngiyazi ukuthi uhlangothi lwami angeke lusanakwa kakhulu njengamanje. Okwenzekile sekwenzekile. Kubuhlungu kakhulu kodwa ngikwazile ukululama. Engikufundile ukuthi sengiyabazi abantu ekumele ngibasondeze eduze kwami,” ebalisa.
Njengoba ikusasa laleli leqembu lingacaci, sekuholele ekuthi abanye abadlali , bathola amadlelo aluhlaza kwiLamontville Golden Arrows neRichards Bay FC.
Leli qembu laKwaZulu Natal elizinze eMgungundlovu, lisematheni njengoba lafakwa endalini abakwa SA Revenue Services, ngenxa yokuthi uMaMkhize ekweleta imali engaphezulu kuka R40 million.
Namanje akekho osephumelele ukulithenga njengoba abebelifuna kutholakale ukuthi kukhona okungaqondile ngabo ngokuphathwa kwezimali.