KUFEZEKE IPHUPHO KUMLINGISI WAKWAMASHU
UMBIKO: MABUNHLE MLABA
UBONGA ukuphenduleka kwemithandazo yakhe ngokudlala izindawo ezigqamile umlingisi waKwaMashu osekhombise ukudlondlobala kulo mkhakha. USibonakaliso Mazibuko, odume ngelikaNgabadi kwabaningi, kuphuzwa itiye ngaye kulezi zinsuku ngenxa yokudlala ngobunyoninco indawo ehlekisayo ayidlala ku-Amalanga Awafani aboniswa kugamengxe elesithupha ( 6:30) ntambama, kusukela ngoMsombuluko kuya kuLwesihlanu ku-SABC 1.
Lo mlingisi idlala indawo kaDulas Shange ongumculi ofufusayo kamaskandi, obuye abe umshayeli wetekisi waseNquthu. Uzithola esewele ngelibanzi ngoba intombi yakhe eyiwele uThembi Gumede (olingiswa uNontsikelelo Mthiyane) iwina iLotto kaR20 million. Ngoba isibona ingcebo imambana enguDulas ivele yenza ilumbo yayoboleka izinkomo yayocela isihlobo esihle kubo kaThembi. Seyize yayeka umsebenzi wetekisi yaqoma ukuncika entombini njengoba kutetenyukwa eThekwini kubhubhudlwa lemali ngotshwala obubizayo nezingubo zikanokusho. Ngaphambi kwalo mdlalo wakwaSABC uNgabadi ubesevele ezinameke ezinhliziyweni zabaningi ngendawo kaSipho ayidlala kuSmoke & Mirror ekhonjiswa Ku e-tv ngehora lesi- 9h00 ebusuku. Ulingisa “newele” uTim avamise ukwenza “imbhedo” ndawonye. UNgabadi uthe okwenzekayo njengamanje empilweni yakhe , ukuvela kuma telenovela amabili kanye kanye, into ayevele eyithandazela kuNkulunkulu.
“UNkulunkulu uyabathanda bonke bakhe. Ngikholwa ukuthi lezi zindawo engizidlalayo njengamanje zingifice ngisefomini futhi ngethemba lokhu kuzovula eminye iminyango,” kusho lo mlingisi.
USibonakaliso useke wazwakala kaningi emidlalweni yomoya uKhozini FM.
Lo mlisa, ozimpande zakhe zisoLundi nowavumbululwa uThabo Mnguni weManguni Productions, useke wabonakala edlala izindawo ezimfishane koGenerations: The Legacy, Uzalo, eHostela neminye. Unxuse ababukeli be-Amalanga Awafani ukuthi baqhubeke bawabuke ngoba kuningi abasazokuthokozela. “Kusazoshuba kakhulu. Abantu sizobashiya bekhexile, kwabanye kusazoba buhlungu izisu ukuhleka,’” usho kanje.
Ubonge ngendlela Abantu abayithakasele ngakhona indlela yobubhinca ayidlalayo, bathi “ukhuphuka” nayo futhi ihambisana nesidlaliso sakhe sokuba “iNgabadi.”