I- JCI NONYAWO OLUSHA KUBUCHWEPHESHE BOMASIPALA

UMBIKO: ANELE ZUMA

I-JCI Durban iza nezinguguko ezibalulekile emkhakheni wezobuchwepheshe, njengoba izosingatha olunye lochungechunge lohlelo abazolwenza, eThekwini ngoLwesihlanu.
Lolu hlelo olubizwa ngeHackathon luzokuba eRitson Campus, Mansfield Hall e Gate 8, luzokuba luhlabahlose ngemiqhudelwano yokuqhamuka nezinto ezintsha emkhakheni wezobuchwepheshe.
UMengameli weJCI Durban uMnuz Siphiwe ‘ SK’ Khuzwayo uthi lolu hlelo luzohlanganyela nomphakathi uma seyethula i-Hackathon yeSmart City ehamba phambili eThekwini.
“Lo mcimbi ungowokuqala ohlukile ozobanjwa njengengxenye ye- 2025 JCl Africa & Middle East Conference. Sihlele ukuthi ube yinsika yokuqala yokwakha ikusasa eliqhakazile kuleli dolobha,” kuchaza uMnuz Khuzwayo.
Uthi lolu hlelo luzobe luhlanganisa izingqondo ezisakhulayo ezinamakhono kwezobuchwepheshe.
“Inhlosongqangi yalo mcimbi ukuthuthukisa nokuphuma nesisombululo kwezobuchwepheshe, esihambisana nombono kaMasipala waseThekwini ngonyaka ka-2030. Lokhu akusilo ulwazi olujwayelekile kwezobuchwepheshe, kodwa kuwumzamo oqondile wokwakha amadolobha akwazi ukusebenzisa imishini yesimanje nezindlela zesimanje zokuphila,” esho.
Ephetha uthi le Hackathon ingaphezu kokusungulwa kwezinto ezintsha- kodwa iyisinyathelo esibheke ukwakha ikusasa abafisa ukulibona emiphakathini.