OWASE-MZANSI ETHUBENI LENGQOPHAMLANDOESIBHAKELENI

UMBIKO: MABUNHLE MLABA

IBHOKISA lesifazane laseNingizimu Afrika uSimangele “Smash” Hadebe lisethubeni lokuzifaka emlandweni, ngokuba elokuqala ukunqoba isicoco seWorld Boxing Council (WBC) silver flyweight.
Uma enqoba umpetha uGabriela “La Bonita” Sànchez Saaverda ngakubo eMexico ezintatha ngoMgqibelo.
Selokhu elakuleli lamukelwa emndenini wesibhakela besifazane ngo 2007, alikho ibhokisa lakhona eselike lanqoba isicoco sale nhlangano, ebalwa nezine ezinkulu emhlabeni. Mabili kuphela amabhokisa esilisa esakwaze ukuphakamisa isicoco se-WBC. Kwaqala uThulani “Sugarboy” Malinga ngo 1995, kwalandela uDingaan “Rose of Soweto” Thobela (oshone ngonyaka odlule) ngonyaka 2001.
USimangele ozalwa eLimpopo kodwa osezinze KwaThema eGoli, uqeqeshwa uKhangelani Jack, owake waqokwa njengomqeqeshi ovelele kwiBoxing SA Awards, eminyakeni emibili edlule. Kuwo lowo mcimbi uSimangele waqokwa njengebhokisa elivelele kwabesifazane, ngenxa yokuthi waqeda lowo nyaka enqobe ibhande likazwelonke nele-African Boxing Union. USimangele uzoya kule mpi eqhoshe ngerekhodi lokunqoba izimpi eziyi-14, usahlulwe kayi-4, wadlala ama draw amabili kanti unama knockout amahlanu. USanchez, okulindeleke agqugquzelwe izindimbane zabalandeli bangakubo, unerekhodi lokunqoba izimpi eziyi 11 kanti usahlulwe kathathu. Ezimnandi kubalandeli besibhakela ukuthi bazokwazi ukuyibuka le mpi njengoba abakwa Discover Sport bethenge i-link.