AMAPHOYISA EMKHANKASWENI WOKUQEDA IZIDLEKE ZEZIDAKAMIZWA E-KZN
IZIDAKAMIZWA nemali okushaqwe amaphoyisa kumlisa wokufika kuleli. ISITHOMBE: SAPS
NOMCEBO NGEMA
ULOKHU uthele njalo izithelo ezinhle umkhankaso wamaphoyisa aKwaZulu-Natal, wokulwa nobugebengu esifundazweni, lokhu kuza ngemva kokuthi kuboshwe owokufika kuleli otholakale nezidakamizwa zemali elinganiselwa ku-R80 000.
Amaphoyisa angaphansi koPhiko lwe-Provincial Drugs and Firearms Unit ngokubambisana nawoPhiko lwe-Provincial Illicit and Counterfeit Unit, abophe owesilisa wokufika oneminyaka engama-29 ubudala ngecala lokutholakala nezidakamizwa.
Lo mlisa uboshwe amaphoyisa ngesikhathi eqhuba umkhankaso wawo eRichards Bay izolo.
Amaphoyisa athi alunywe indlebe ngalo mlisa, abe esenikela kwelinye lamabhilidi ahlala kulona eRichards Bay, nokuthe uma lo mlisa ebona amaphoyisa wazama ukulahla izidakamizwa ngewindi.
Ngesikhathi amaphoyisa engena phakathi egumbini lalo mlisa, athole izidakamizwa zohlobo lwe-cat engu-285 grams, icrystal meth, irock cocaine, amaphilisi e-ecstasy angama-57 namaphakethe ayi-5 ecat.
Aqhuba athi lezi zidakamizwa azitholile zilinganiselwa ku-R80 000, aphinde athola imali engadalulwanga isamba sayo, asola ukuthi eyazo izidakamizwa.