OWE-SUPERSPORTS NOGQOZI LOKUFUKULA INTSHA

UMBIKO: MABUNHLE MLABA

UMETHULI wezemidlalo kumabonakude uthi unesifiso sokuvumbulula amakhono entsheni kwezokusakaza nasekulingiseni.
UReggie “Mapensela” Ndlovu owethula ezemidlalo ngesiZulu kwiSuper Sport, uthi iphupho lakhe ukuzibona enza umehluko entsheni.
“Engifisa ukukwenza ukuthuthukisa ikhono lentsha yasemakhaya naselokshini. Ngifisa ukukhiqiza izihlabani zabalingisi abazokhula babengabaqondisi abanohlonze,” ebeka.
UReggie uveze leli phupho lakhe leminyaka ngemuva kokuthweswa iziqu zePost Graduate Certificate in Education eFET, egxile kwiCreative Arts (Senior Phase) and Dramatic Arts.
“Ngibonga uNkulunkulu ngokunika umdlandla wokuqhubeka nokwenza into engijabulisayo, ukusakaza ibhola ngendlela abalandeli abathi iyabakitaza. Sengibona ukuthi sikhulu isipiliyoni esengisizuzile kule ndima, yingakho sengifuna ukusidlulisela entsheni. Ngiqale ngokusebenza ngemuva kwekhamera kuMuvhango ngadlulela kuScandal, Rhythm City, Generations:The Legacy ukubalwa imidlalo embalwa, esho.