KUZOKLEZA ABABHALI KOWE-IZIKO BOOK FAIR FESTIVAL
ANELE ZUMA
KUNOTHISWA ulwimi ngemibhalo ukuthuthukisa ikusasa ngolimi lokhokho, njengoba ababhali bakwaZulu-Natal bezokleza ulwazi olunzulu emcimbini we-Iziko Art International Book Fair Festival, ozoqala namuhla mhlaka 5 September uze uphothulwe mhla ziyi-12.
UMntomuhle Mcambi ongumnikazi we-Iziko Art Company okuyiyo ehlela lo mcimbi osezingeni lo omhlaba, uthi amagama azophenduka umculo, izincwadi zibe izibani, kuthi amasiko aphile phakathi kwezinkundla zobuciko.
“Inhloso ukuthuthukisa ulimi lwethu, ukulilondoloza ukuthi lungashabalali nokukhuthaza usiko lokufunda. Lo mcimbi uzohlanganisa izimbongi, ababhali, abashicileli, ososayensi, ongoti bolimi namasiko abaqhamuka kuleli nasemazweni ahlukahlukene ase-Afrika.” Kubeka uMcambi.
Uthi isiqubulo sabo sithi “Izilimi Zokhokho Bethu: Ukubhala Ikusasa le-Afrika ” .
“Izikhungo, ababhali abasebenzisa ulimi lwebele namaciko asebenza ubuciko besintu, bazokwenza umbukiso wemisebenzi yabo. Kuzokubanemibukiso, amaciko ahlanganisa umculo, izinkondlo nezingxoxo, okuzoba ubufakazi bokuhluka kwamagugu ase-Afrika, “ esho.
Uveze ukuthi okubalulekile ngalo mcimbi ukuthu ukuzohlomulisa imiphakathi yaKwaZulu-Natal amakilasi azokuba khona wokucobelelana okuhloswe ngawo ukuqeqesha ababhali, abafundi nabashicileli abasafufusa.
