IZOQALA KULEMPELASONTO IMATHEMBA CUP
AZOGIJIMISANA emqhudelwaneni iMathemba Super Cup amaqembu akwi KZN ABC Motsepe League.
ISITHOMBE: Mathemba Super Cup
MALIBONGWE MAZIBUKO
UMQHUDELWANO webhola lezinyawo iMathemba Super Cup kulindeleke ukuthi uqale ngokusemthethweni kule mpelasonto, mhla ziyi-11 kuMbasa 2026, ngemidlalo yokuqala eqala ngo-09:00 ekuseni.
Lo mqhudelwano uzobandakanya amaqembu angama-24 adlala kuKZN ABC Motsepe League, okuhlanganisa womabili ama-stream A no-B. Amaqembu azohlukaniswa abe amaqoqo kusukela ku-Group A kuya ku-Group G emidlalweni yesigaba samaqoqo.
Imidlalo izobanjelwa ezinkundleni eziyisikhombisa ezahlukene esifundazweni okuhloswe ngakho ukusondeza nokusabalalisa umqhudelwano emphakathini ehlukene yaKwaZulu-Natal.
Iqembu elizovikela isicoco, Umvoti Football Club, kulindeleke ukuthi libhekane nengcindezi enkulu njengoba amanye amaqembu ezimisele ukuliphuca ubukhosi balo kulo mqhudelwano othathwa njengomunye obalulekile ekuthuthukiseni ithalente lebhola lezinyawo esifundazweni.
Abahleli balo mqhudelwano bakholelwa ukuthi iMathemba Super Cup izoletha umdlandla omusha, iphinde inikeze abadlali ithuba lokuziveza phambi kwabalandeli nabathungathi bethalente.
Lo mqhudelwano waqala ngonyaka ka-2025 kanti iqembu elizonqoba lizogoduka no-R 100 000.